2020թ.-ից ՀՀ Կոտայքի մարզի առաջին ատյանի ընդհանուր իրավասության քրեական դատարանում քննվում է մեր վստահորդներ Ա.Ա.-ի և Ա.Ս.Ա-ի կողմից խմբով սպանություն կատարելու և խմբով զենք ու զինամթերք ձեռք բերելու, պահելու ենթադրյալ հանցանքների կապակցությամբ հարուցված քրեական գործը՝ նախատեսված 2003թ. ընդունված ՀՀ քրեական օրենսգրքի 104-րդ հոդվածի 2-րդ մասի 7-րդ կետով և 235-րդ հոդվածի 2-րդ մասով: Մեղադրյալներից Ա.Ա.-ն անազատության մեջ է ավելի քան 5 տարի, իսկ Ա.Ս.Ա-ն՝ ավելի քան 2 տարի:
«LSA» փաստաբանական գրասենյակի փաստաբաններ Էդգար Այվազյանին և Գուրգեն Ներսիսյանին հաջողվեց դատարանում համոզիչ փաստարկել և ապացուցել, որ մեղադրյալներից Ա.Ս.Ա-ն ընդհանրապես առնչություն չունի դեպքի հետ: Ապացույցների հետազոտումն ավարտելուց հետո դատախազությունը ստիպված եղավ նահանջել և գործով հանրային մեղադրողը 20.09.2024թ. որոշեց փոփոխել Ա.Ա.-ի մեղադրանքը՝ նրա արարքը որակելով 2003թ. ընդունված ՀՀ քրեական օրենսգրքի 104-րդ հոդվածի 1-ին մասով և 235-րդ հոդվածի 1-ին մասով, իսկ Ա.Ս.Ա-ի մեղադրանքից փաստացի հրաժարվեց: Ավելի քան 2 տարի տևողությամբ անազատության մեջ գտնվող Ա.Ս.Ա-ն նիստերի դահլիճից դատարանի որոշմամբ ազատ արձակվեց: