Օրենքի իմացությունը, օրենքի պրակտիկ կիրառության և վարչական մարմինների մոտեցումների մասին տեղեկացվածությունը հանդիսանում է գործարար հաջողության հիմնական գրավականներից մեկը:
Հենց վերոհիշյալ նպատակով վերջերս «LSA» փաստաբանական գրասենյակի փաստաբանների կողմից «Մանթաշյանց» գործարարների ակումբի անդամների համար կազմակերպվել էր իրավաբանական դասընթաց, որի շրջանակում քննարկվել էին մի շարք թեմաներ, մասնավորապես գործարարի կողմից կնքվող պայմանագրերի ռիսկերի ճիշտ գնահատման եվ նվազեցման (ներդրումային, աշխատանքային եվ այլ հաճախ հանդիպող պայմանագրերի օրինակներով), հարկային ստուգման տեսքով հարկային վարչարարության, օրենսդրության և դրա պրակտիկ կիրառության, հարկային ենթադրյալ իրավախախտումների արհեստական քրեականացման, վերջերս հաճախակի դարձած քրեադատավարական բիրտ գործիքակազմի կիրառման, բարեխիղճ մրցակցային շուկայի ապահովման գործում մրցակցության պաշտպանության հանձնաժողովի դերի եվ հանձնաժողովի պաշտպանությանը դիմելու հնարավորությունների ու հեռանկարների, վարչական մարմինների կայացրած ակտերի բողոքարկման դատական պրակտիկայի, բիզնես գործունեության ընթացքում արտադրական անվտանգության, սանիտարահիգիենիկ, հրշեջ անվտանգության կանոնների խախտման հետևանքով առաջացող վարչական, քաղաքացիական եվ քրեական բնույթի ռիսկերի վերաբերյալ։
Տեղում քննարկվել են նաև գործարարների բարձրացրած ու մտահոգող հարցերը:
Գործարար հատվածի բիզնես հաջողությունները, նրանց գործունեության կազմակերպման ու արդյունավետության մակարդակի անդադար աճը ձեռքբերում է ոչ միայն գործարարի, այլև պետության ու բոլորիս համար, հետևաբար մեր գիտելիքներով և օրենսդրության պրակտիկ կիրառության փորձով գործարարների հետ կիսվելու արդեն պարբերական դարձած այս հանդիպումները կրելու են շարունակական բնույթ:
«LSA» փաստաբանական գրասենյակի փաստաբանները իրենց երախտագիտությունն են հայտնում «Մանթաշյանց» գործարարների ակումբի ղեկավարությանը և անդամներին` բարձր մակարդակի ընդունելության և հանդիպման համար: